URIMI I DREJTORIT TË PËRGJITHSHËM ME RASTIN E FESTAVE TË FUNDVITIT
Të nderuar kolegë, ish kolegë, bashkëpunëtorë, miq dhe dashamirës të Gardës së Republikës,
Në këtë prag të festave të fundvitit, më lejoni të ndaj me ju disa momente reflektimi dhe t’ju drejtoj urimet e mia më të përzemërta për ju dhe familjet tuaja. Ky është një moment i veçantë për të ndalur ritmin e përditshmërisë sonë të ngarkuar, për të parë pas drejt vitit që po mbyllet dhe për të falënderuar të gjithë ata që kanë kontribuar në përmbushjen e misionit tonë të përbashkët.
Viti që po lëmë pas ka qenë sfidues, por njëkohësisht i mbushur me arritje të rëndësishme për Gardën e Republikës. Çdo sukses institucional i shënuar është fryt i punës së palodhur, përkushtimit dhe disiplinës që ju keni treguar çdo ditë.
Së bashku, kemi arritur rezultate të prekshme dhe kemi hedhur themelet për projekte edhe më ambicioze në të ardhmen. Ju falënderoj sinqerisht për përkushtimin tuaj dhe për frymën pozitive që përcillni për të realizuar sfidat tona të përbashkëta.
Festat e fundvitit janë një kohë për të ndarë momente të çmuara me familjet dhe të dashurit tanë, për të shprehur mirënjohje dhe për të ndërtuar besimin për të ardhmen. Uroj që këto festa të jenë një burim gëzimi, ngrohtësie dhe shprese për secilin prej jush. Le t’a shfrytëzojmë këtë kohë edhe për të rigjetur energjinë që do të na duhet për sfidat që na presin në vitin e ardhshëm.
Le të hyjmë në Vitin e Ri me besim dhe vendosmëri për të vazhduar të punojmë me të njëjtin pasion dhe përkushtim, duke ruajtur gjithmonë vlerat që na identifikojnë si punonjës të Gardës së Republikës. Bashkë, jam i bindur se do të arrijmë të përmbushim çdo detyrë që na ngarkohet dhe do të vijojmë të mbajmë lart emrin dhe prestigjin e institucionit tonë.
Gëzuar festat e fundvitit dhe urime për një Vit të Ri të mbarë, plot shëndet, suksese dhe paqe për ju dhe për familjet tuaja!
Me respekt dhe mirënjohje,
Ermal Onuzi
